ભોળી રે ભરવાડણ હરિને વેચવા ચાલી
ભોળી રે ભરવાડણ હરિને વેચવા ચાલી
સોળ સહસ્ત્ર ગોપીનો વાહાલો
સોળ સહસ્ત્ર ગોપીનો વાહાલો
મટુકીમાં ઘાલી
ભોળી રે ભરવાડણ હરિને વેચવા ચાલી

અનાથના નાથને વેચે આહીરની નારી
અનાથના નાથને વેચે આહીરની નારી
શેરીયે-શેરીયે સાદ પાડે
શેરીયે-શેરીયે સાદ પાડે
લ્યો કોઈ મોરારિ
ભોળી રે ભરવાડણ હરિને વેચવા ચાલી

મટુકી ઉતારી માંહી મોરલી વાગી
મટુકી ઉતારી માંહી મોરલી વાગી
વ્રજનારીને મુખ જોતા
વ્રજનારીને મુખ જોતા
મૂરછા લાગી
ભોળી રે ભરવાડણ હરિને વેચવા ચાલી

બ્રહ્માદિક ઇન્દ્રાદિક સરખા કૌતક એ પેખે
બ્રહ્માદિક ઇન્દ્રાદિક સરખા કૌતક એ પેખે
ચૌદ લોકના નાથને
ચૌદ લોકના નાથને
કાંઈ મટુકીમાં દેખે
ભોળી રે ભરવાડણ હરિને વેચવા ચાલી

ગોવાલણીના ભાગ્યે પ્રગટ્યા અંતરજામી
ગોવાલણીના ભાગ્યે પ્રગટ્યા અંતરજામી
દાસલડાંને લાડ લડાવે
દાસલડાંને લાડ લડાવે
 નરસૈંયાનો સ્વામી
ભોળી રે ભરવાડણ હરિને વેચવા ચાલી