ગગનવાસી ધરા પર બે ઘડી શ્વાસો ભરી તો જો
જીવનદાતા જીવનકેરો અનુભવ તું કરી તો જો

સદાયે શેષશૈયા પર શયન કરનાર ઓ ભગવંત
ફકત એક વાર કાંટાની પથારી પાથરી તો જો

જીવન જેવું જીવન તુજ હાથમાં સુપરત કરી દેશું
અમારી જેમ અમને એક પળ તું કરગરી તો જો

નથી આ વાત સાગરની આ ભવસાગરની વાતો છે
અવરને તારનારા તું સ્વયં એને તરી તો જો

નિછાવર થઇ જઇશ એ વાત કરવી સહેલ છે ‘નાઝીર’
વફાના શ્વાસ ભરનારા મરણ પહેલાં મરી તો જો