જય જય જય જયોતિર્મયી માતા
વંદુ માત ભવાની …

લાડકવાયા પુત્રરત્નને પ્રભુપંથે પધરાવ્યા,
ત્યાગ તમારો ધન્ય ગણીને દેવો પણ હરખાયા … જય જય

દેવપ્રયાગે પ્રભુની સાથે છાયા બની વિરાજ્યાં.
કષ્ટ સહ્યાં એકાંત પ્રદેશે શ્રદ્ધા દીપ પ્રકટાવ્યાં … જય જય

વ્રત ઉપવાસ પ્રભુના આપે સમજણ થકી વધાવ્યાં,
પ્રત્યક્ષ માતૃદેવ ગણીને પ્રભુએ પણ અપનાવ્યાં … જય જય

પુત્ર રત્નને પ્રભુરૂપ માની પરમ શાંતિ તમે પામ્યાં,
જીવનનું કલ્યાણ કરીને ભવનાં બંધન ટાળ્યાં … જય જય

સેવાનું સદભાગ્ય ધરીને સર્વેશ્વરીને સ્વીકાર્યાં,
અંતે કૃપા ઘણી વરસાવી આશિષ દઇને સિધાવ્યાં … જય જય

મનહર મંગલ માતૃઅંકમાં બાળસ્વરૂપે પધારી,
યોગેશ્વર પ્રભુ દર્શન દેજો વિનંતિ લેજો વધાવી … જય જય

કૃપાતણી વર્ષા વરસાવો પરમધામથી પ્રીતે,
સર્વેશ્વરીનો સાદ સુણી લો યોગની અવનવી રીતે … જય જય

– મા સર્વેશ્વરી