ખુશી દેજે જમાનાને, મને હરદમ રુદન દેજે
અવરને આપજે ગુલશન, મને વેરાન વન દેજે..

સદાય દુખ માં મલકે, મને એવા સ્વજન દેજે,
ખીજા માં પણ ના કરમાય, મને એવા સુમન દેજે.(૧)
જમાનાના બધા પુણ્યો જમાનાને મુબારક હો,

હું પરખું પાપને કાયમ, મને એવા નયન દેજે… (૨)
હું મુક્તિ કેરો ચાહક છું, મને બંધન નથી ગમતા,
કમળ બિડાય તે પેહલા , ભ્રમરને ઉડ્ડયન દેજે. (૩)

સ્વમાની છું, કદી વિણ આવકારે ત્યાં નહીં આવું,

અગર તું દઈ શકે મુજને તો ધરતી પર ગગન દેજે.(૪)

ખુદા આ આટલી તુજને વિનતી છે આ ‘નાઝિર’ની,

રહે જેનાથી અણનમ શીશ, મને એવા નમન દેજે. (૫)

– નાઝિર દેખૈયા