માએ ગરબો કોરાવ્યો
માએ ગરબો કોરાવ્યો ગગન ગોખમાં રે
સજી સોળ રે શણગાર, મેલી દીવડા કેરી હાર,
માએ ગરબો કોરાવ્યો ગગન ગોખમાં રે ..

ગાગરની લઈ માંડવી માથે ઘુમતી મોરી માત
ચુંદલડીમાં ચંદ છે સાથે રૂપલે મઢી રાત
જોગમાયાને સંગ દરિયો નીતરે ઉમંગ
તમે જોગનીયો સંગ
કે માએ પાથર્યો પ્રકાશ ચૌદ લોકમાં રે..
માએ ગરબો કોરાવ્યો ગગન ગોખમાં રે ..

ચારે જુગના ચૂડલા મારો સોળે કળાનો વાન
અંબાના અણસારા વિના હાલે નહીં પાન
માના રૂપના નહીં જોડ એને રમવાના છે કોડ
માની ગરબા કેરી કોર
કે માએ ગરબો ચગાવ્યો ચાતર ચોકમાં રે..
માએ ગરબો કોરાવ્યો ગગન ગોખમાં રે ..