મૈત્રીભાવનું પવિત્ર ઝરણું,
મુજ હૈયામાં વહ્યા કરે
શુભ થાઓ આ સકળ વિશ્વનું,
એવી ભાવના નિત્ય રહે

ગુણથી ભરેલા ગુણીજન દેખી,
હૈયું મારૂં નૃત્ય કરે
એ સંતોના ચરણકમળમાં,
મુજ જીવનનું અર્ઘ્ય રહે

દીન ક્રુર ને ધર્મવિહોણાં,
દેખી દિલમાં દર્દ વહે
કરુણાભીની આંખોમાંથી,
અશ્રુનો શુભ સ્રોત વહે

મૈત્રીભાવનું પવિત્ર ઝરણું,
મુજ હૈયામાં વહ્યા કરે
શુભ થાઓ આ સકળ વિશ્વનું,
એવી ભાવના નિત્ય રહે

માર્ગ ભૂલેલા જીવન પથિકને,
 માર્ગ ચીંધવા ઊભો રહું
 કરે ઉપેક્ષા એ મારગની,
તોય સમતા ચિત્ત ધરૂ

વીર વાણીની ધર્મ ભાવના,
હૈયે સહુ માનવ લાવે
વેર ઝેરના પાપ તજીને,
મંગળ ગીતો એ ગાવે

મૈત્રીભાવનું પવિત્ર ઝરણું,
મુજ હૈયામાં વહ્યા કરે
શુભ થાઓ આ સકળ વિશ્વનું,
એવી ભાવના નિત્ય રહે