સાગ સીસમનો ઢોલિયો રે વાલમા
અમરા ડમરાનાં વાણ મારા વાલમા
સાગ સીસમનો ઢોલિયો રે વાલમા …
 
ત્યાં ચડી શ્રીકૃષ્ણ પોઢે મારા વાલમા
રૂકમણી ઢોળે છે વાય મારા વાલમા
સાગ સીસમનો ઢોલિયો રે વાલમા …
 
વાય ઢોળંતાં પૂછિયું મારા વાલમા
સ્વામી અમને ચૂંદડિયુંની હોંશ મારા વાલમા
સાગ સીસમનો ઢોલિયો રે વાલમા …
 
કેવાં તે રંગમાં રંગાવું મારા વાલમા
કેવી કેવી પડાવશું ભાત મારા વાલમા
સાગ સીસમનો ઢોલિયો રે વાલમા …
 
કસુંબલ રંગમાં રંગાવો મારા વાલમા
ઝીણી ઝીણી ચોખલિયાળી ભાત મારા વાલમા
સાગ સીસમનો ઢોલિયો રે વાલમા …
 
ઓઢી પહેરીને પાણી સંચર્યાં રે વાલમા
જોઈ રિયા નગરીના લોક મારા વાલમા
સાગ સીસમનો ઢોલિયો રે વાલમા …
 
કેવા તે કુળના છોરૂ મારા વાલમા
કેવા તે કુળના વહુઆરૂં મારા વાલમા
સાગ સીસમનો ઢોલિયો રે વાલમા …
 
માધવકુળના છોરૂ મારા વાલમા
જાદવકુળના વહુઆરૂં મારા વાલમા
સાગ સીસમનો ઢોલિયો રે વાલમા …